خطيبتى وصديقهـــا على النت !!!!!!!
أنا بحب خطيبتـى أوى وكنت فاكر إن هى كمان بتحبنى ... لحد ماكتشفت إنها بتكلم شاب على النت والموضوع بينهم مش مجرد صداقه زى مافهمتنى
الموضوع بدأ لما كنت عندهم فى البيت مره وكانت هى نايمه تعبانه وروحت أنا ووالدتى نزورها ... طولت فى النوم ولما حبينا ننزل والدتها حلفت اننا نستنى معاها وتقعد تدردش مع والدتى
وانا قولتلهم خلاص اسيبكم مع بعض والعب على الكمبيوتر
وفعلا قومت فتحته وفتح على الاكونت بتاعها على طول لأن مفيش غيرها بتستخدم الكمبيوتر
وفجأه لقيت رساله من شاب بيقولها انتى فين من إمبارح قلقتينى عليكى
أنا فى الأول قولت يمكن حد من قرايبها أو معارفها بس الفضول خلانى افتح الرسايل القديمه
وقريتها ,,, أنا عارف ان اللى عملته غلط بس كانت لحظة فضول
الرسايل كانت بين اتنين بيحبوا بعض ودى كانت صدمتى فيها
استنيت لما خفت وقولتلها قالتلى ده صديق عادى انت اللى مكبر الموضوع
انا بحبها بس مش قابل ده على كرامتى وخصوصا انى شوفت الكلام مش اصدقاء بس
وحتى لو اصدقاء من حقى أرفض إن خطيبتى يكون ليها صديق شاب
انا مش عارف أتصرف إزاى ...أفسخ الخطوبه وأقول لأهلها وأهلى اللى حصل ولا أطلب منها تقطع علاقتها بيه مع انى هكون شاكك فيها ومش مرتاح
ياريت تساعدونى
